طبیعت یئنه ده شیلتاقلیق ائتدی

اهره هئریزه ورزیغانا گل

زلزله باتیردی ائلی اوبانی

طبیعتین الی باتدی قانا گل

اهره هئریزه ورزیغانا گل

***

سهندله ساوالان گئیسین قارانی

چونکو یاسا باتیب داغی آرانی

آللاه کیم ساریسین بئله یارانی؟

طبیعتین الی باتدی قانا گل

اهره هئریزه ورزیغانا گل

***

هارایا امدادا چاتانیم گلسین

ییخیلان قولوندان توتانیم گلسین

وارینا گومانی یئتنیم گلسین

طبیعتین الی باتدی قانا گل

اهره هئریزه ورزیغانا گل

***

اوغلو الدن گئدن آنا آغلاییر

آناسین ایتیرمیش بالا آغلاییر

آشیق قوربان چکیر نالا آغلاییر

طبیعتین الی باتدی قانا گل

اهره هئریزه ورزیغانا گل

آشیق قوربان پورولی علیار- اورمو

22/5/1391

ادامه مطلب

  اولو یارادانین آدی ایله

((من اصبح و لا یهتم بامور المسلمین فلیس بمسلم)) پیغمبر(ص)

آخشامی مسلمانلارین ایشلرینه چالیشمایاراق صبح ائدن، مسلمان دگیل.

قاراداغ ماحالی ورزیغان بخشی

شیرین دیللر ایله خاطرلا منی

هر زامان قلبیمده دولانیر نقشی

آچان گوللر ایله خاطرلا منی

آشیق ائلینکی دیر، ائل آشیغیندیر. ائلینده غمی آشیقلاریندیر. یوردوموزون گوللو چیچکلی بؤلگه سی و قهرمانلار دیاری اولان، قاراداغین زلزله خبری و اورادا اوز وئرن فاجعه لر بیزی ده سارسیتدی.اوزونتولرله بو اولایدا نئچه یوز نفر حیاتین ایتیریب. نئچه مین نفرده یارالی اولاراق، یوردوموزون مختلف شهرلرینده اولان خسته خانالارا یئرلشدیریلیبلر. بوتون وطنداشلاریمیزی، اؤزللیکله هنر و اینجه صنعت دونیاسیندا چالیشانلاری بو آغیر حادثه نین آجیلارینی قالدیرماغا چاغیریریق.انشاء الله وطنداشلاریمیزین یاردیملاری ایله بو حادثه نین آجیلاری آرادان تئزلیکله قالدیریلار. مادی یاردیم چاغری لاری ایله بیرلیکده ائلیمیزی، یارالی اولاراق خسته خانالاردا یاتان وطنداشلاریمیزی یاد ائتمگه چاغیریریق. مختلف شهرلرده غریب اولماسینلار دئیه و معنوی دستک اوچون اونلارلا گؤروشوب، دردلرینه اورتاق اولماغا چاغیریریق. بورادان زلزله دن ائتگی لنن یوردداشلاریمیزا بیلدیرمه لی ییک، 110 نفر غربی آذربایجان آشیقلار درنگی­ نین اویه لری سیزین یانینیزدادیر و سیزین اوچون اللریندن گلنلری اسیرگمه­یه­جکلر. آللاهدان اؤلنلره رحمت، قالانلارا دؤزوم و یارالیلارا شفا دیله ییریک. تانری یاردیمچیمیز اولسون. غربی آذربایجانین آشیقلار درنگی 23/5/1391

آشیق درویش وهاب زاده نین وفاتینین 19-جو ایل دؤنومو و آغیرلاماسی اورمودا کئچیریلدی. بو مراسم  ایکی بؤلومدن تشکیل تاپمیشدی.

ایکینجی بؤلومده­ ساعت 5 ایله 8 آراسی اورمونون صفی الدین اورموی سالونوندا درویش اوچون حاضرلانان سازلی-سؤزلو آخشام گلن­لره سونولدو.

ناهاردان سونرا قورولان مراسمین بؤلوملر:

1- بیرینجی بؤلوم، رحمتلیک آشیق عزیز شهنازی­نین آشیق درویشین وفاتیندا یازدیغی شعر ایله باشلادی. شعر اوخوندوقدان سونرا اورمونون حوزه هنری اداره سینین موسیقی بؤلومونون سوروملوسو داریوش علیزاده، آپاریجی اولاراق گلن­لره خوش گلدین دئدی. سونرا دوللو مصطفانین آشیقلارا یازدیغی بیر شعری اوخودو و اورمولو رسام ارسلانی جنابلارینداندا آشیق درویشدن بیر رسم چکدیگی اوچون و او رسیمی ایلک دفعه مراسمده آچیلیشینین اولدوغونا گؤره تشکر ائتدی و بو رسیمی سئن اوسته یئرلشدیردیلر.

2- آشیق درویشین بیرینجی و ان بؤیوک شاگردی سئن اوسته دعوت ائدیلدی. آشیق اسمعلی لطفی(1316) اوستادینین سازی ایله بیر غربتی هاواسی اوخودو.

3- آشیق صبور شریفی(1334) اوستادینا یازدیغی بیر شعری اوخودو.

4- اشیق عبدالله اشرفی(1330) اوستادینا حاضرلادیغی بیر هاوا ایله اونو خاطرلادی و بیر خاطره­سینیده گلن­لره تقدیم ائتدی.

5- شاعر محمود شامی سئن اوسته دعوت اولاراق، آشیق درویشین وفاتیندا یازدیغی شعری گلن­لره اوخودو.

6- آشیق درویش حاقدا بیر کلیپ یایینلاندی. 12 دقیقه­لیک بو کلیپده، آشیق درویشین باجیسی اونون حاقدا دانیشمیشدی و خاطره­لریندن دئمیشدی. بو کلیپین آردیجادا آشیق درویشین اوخودوغو هاوالاریندان بیری یایینلادی. بو هاوا شرور هاواسی ایدی.

7- کلیپدن، سونرا سیرا آشیق عربعلی رحیمی(1344) چاتدی. آشیق درویشین شاگردی اولان, آشیق عرب، اوستادینین سازی ایله و اونون شعری ایله اوروجلوق آیینا گؤزل بیر گرایلی هاواسینی ایفا ائتدی.

8- اصلیتی و سوی کؤکو قوشاچایدان اولان آما تهران یاشایان و آشیق ادبیاتی­نین چالیشانلاریندان اولان جواد دربندی بو مراسمه بیر مکتوب گؤندرمیشدی. بو مکتوبو شاعر اتابک تیموری اوخودو.

9- بو بؤلومده،گنج یازیچی، شاعر و آشیق ادبیاتینین آراشدیرماچیلاریندان اولان احمد اسدی(1367) سئن اوسته دعوت اولوناراق، آشیق درویشین دونیایا گلمه­سی، یاشاییشی و آشیق صنعتینده بوراخدیغی ایزی حاقدا بیر مقاله اوخودو. آردیجادا آشیق درویشه یازدیغی بیر شعری تقدیم ائتدی.

10- شاعر ایرج بهزادنیا(1318) آشیق درویشه ایکی قطعه شعر یازمیشدی، اونلاری اوخویاراق آلقیشینی آلدی. سونرادا خاطره سینی تعریف ائتدی.

11- آشیق درویشین ان کیچیک شاگردی اولان، آشیق ذکریا ملکی(1350) اوستادینین سئودیگی کسمه کرم هاواسینی اوستاجاسینا ایفا ائتدی. اوخومامیشدان اؤنجه خاطره سینی تعریف ائتدی و آشیغین کیم اولدوغو حاقدا دانیشدی.

12- شاعر، یازیچی و آراشدیرماچی بهرام اسدی، شعرینی اوخوماغا دعوت اولوندو و شعرینی گلن­لره تقدیم ائتدی.

13- اورمولو گنج و استعدادلی یازیچی حسین واحدی( 1359) آشیق درویشه حاضرلادیغی قیسا بیر مقاله­نی اؤزو گله بیلمه­دیگی اوچون دوستونون (نعمت پور جنابلارینین) واسطه­سی ایله بو مراسمده اوخوتدوردو.

14- آشیق درویش حاقدا بیر کلیپ یایینلاندی و آردیجادا آشیق درویشین ایفا ائتدیگی قارص هاواسی یایینلاندی.

15- آشیق درویشی ذهنلرده جانلاندیران و اونون کیمی چالیب-اوخویان سولدوزلو آشیق رضا پوینده(1344) گلن­لرین ایستکی ایله بیر هاوا عوضینه ایکی هاوا اوخودو. آشیق رضا بیر واسطه ایله آشیق درویشین شاگردی حساب اولونور. اونون ساز اوستادی رحمتلیک علیرضا واحدی، آشیق درویشین شاگردی اولموشدور.

16- قوشاچایدان گلن آشیق هدایت موسی­اوغلو(1336)، آشیق درویشین قوشاچایا گئدیشلریندن صحبت آچدی و اونون اورالاردا نه قدر حؤرمتی اولدوغونو دئیه­رک، خاطره­لرین تعریفله­دی.

17- شاعر باباعلی جوانمرد(1332) آشیق درویشه یازدیغی ایکی قطعه شعری تقدیم ائتدی.

18- آشیق علی یئکانلی(1340) آشیق درویشدن بیر خاطره دئیه­رک، اونون حاقدا یازدیغی ایکی شعری سالوندا اولانلارا اوخودو.

19- گنج شاعر علی رشتبر(1358) صحنه یه دعوت اولوناراق، آشیق درویشه شعرینی تقدیم ائتدی.

20- مراسمین سونونجو بؤلومونده، آشیق عبدالله اشرفی و آشیق ذکریا ملکی قاباق قارشی اوخویاراق، بو مراسمین سون بؤلومونو اجرا ائتدیلر.

خاطرلاتمالی­ییق،بو مراسمی حاضرلاییب، قوروب و دولاندیرانلار داریوش علیزاده و احمد اسدی ایدیلر.

 

آشیق اسمعلی اوستادینین سازی ایله اونون سبکینده بیر غربتی هاواسی اوخویور، بو آندا آشیق درویشین قیزی, آتاسینی خاطرلاییر و گؤز یاشینا مالک اولا بیلمه ییر.

آشیق صبور اوستادینا یازدیغی شعری اوخویور

 

آشیق عبدالله چالدیغی و اوخودوغو هاوادا اوستادینی یاد ائدیر

شاعر محمود شامی آشیق درویش حاقدا شعرینی اوخویور

آشیق عرب اوستادی آشیق درویشین اوروجلوغا یازدیغی شعرینی گرایلی هاواسی ایله و ائله آشیق درویشین اؤز سازی ایله چالیب اوخویور...

ندنسه آشیق عرب اوخویاندا، مراسمه قاتیلان خانیم لارین بیری اؤزونو ساخلایا بیلمه ییر و آغلاماغا باشلاییر...

شاعر اتابک تیموری ،جواد دربندی جنابلارینین بو آغیرلامایا گؤندردیگی مکتوبو اوخویور

احمد اسدی آشیق درویشین یاشامینا گؤره بیر مقاله و آردیجا آشیق درویشه یازدیغی شعرینی اوخویور

آشیق ذکریا آشیق درویشین سئودیگی هاواسی اولان کسمه کرمینی چالیر...

شاعر ،یازیچی و آراشدیرماچی بهرام اسدی آشیق درویشه بیر شعر تقدیم ائدیر

آشیق رضا گؤزل سسی و درویشین قایداسی ایله درویشی خاطرلاردا جانلاندیریر

شاعر علی رشتبر آشیق درویشه یازدیغی شعری اوخویور

آشیق عبدالله و آشیق ذکریا قاباق قارشی اوخویورلار

آشیق درویشین سازی

آشیق درویشین سازی اوسته بیلینمه ین بیر شخصین و یا آشیغین شکلی....

اوشاقلاری بیلمه ییرلر کیمدیر....

آما اوغلونون دئدیگینه گؤره وصیت ائدیب بو شکلی ساز اوستوندن قوپارتمایین...

بعضی لر دئییرلر تبریزلی آشیق حسین دیر...

آشیق درویش وهاب زاده نین وفاتینین 19-جو ایل دؤنومو و آغیرلاماسی اورمودا کئچیریلدی. بو مراسم ده ایکی بؤلومدن تشکیل تاپمیشدی.

1-  سحر باشی= بو بؤلومده یوزه یاخین درویش سئودالیسی اونون مزاری اوسته حاضر اولوب و بیر فاتحه ایله اوستادی یاد ائتدیلر.

مزار اوستونده، آشیق علی یئکانلی، آشیق حیدر نیرومند،آشیق ذکریا ملکی، قوشاچایلی صفر ابراهیمی، آشیق صبور شریفی، شاعر ، یازیچی و دین عالمی اولان مصطفی قلیزاده ، شاعر-یازیچی بهرام اسدی اؤز سؤز-صحبتلرینی و خاطره­لرینی آشیق درویش حاقدا سؤیله­یرک او مرحوما رحمت دیله­دیلر.

آشیق صبور شریفی- شاگردی

آشیق یوسف اوحانئس

بیر آشیق آغلایارکن

آشیق حیدر نیرومند

آشیق ذکریا ملکی- شاگردی

آشیق علی یکانلی

شاعر و یازیچی بهرام اسدی

مرحوم بابام آشیق قربان موسیقی نین وسط اوغلو

توکندیم توکندیم برخانه گوزل

سن باشلا قاز منه بیر خانه گوزل

دورد بیر بویوبیر یانه گوزل

زیندان اولدو منه بو دونیا گوزل

 

یار کوچدو اولدو ویرانه گوزل

اورگ سینیب اولوب ویرانه گوزل

منیم احوالیما دا یانیب گوزل

اوخور آغلیر گوزل نه گوزل

 

آشیق اغلو چا لیر او سازی گوزل

هیجیران هاواسینا باخ نه گوزل

تو کندیر احوالینا دوندریر نه گوزل

آیرلیق یاندیر حالیم گوزل

(57 ایل  آشیق قوربانین وفاتیندان سونرا ، بو یازی آشیغیمیزین حاقیندا یازیلان ایلک یازی دیر.)

جمال آوالي آشيق قوربان آدي ايله تانينان، آشيق قوربان موسيقي تقريبي اولاراق، 1268-جي ايلده اورمونون جمال آوا کندينده دونيايا گؤز آچدي. آتاسي لک طايفاسينين خانلاريندان ايدي. اونلارين ائلي، سالماسين لک ماحاليندان جمال آوا کندينه يايلاق- قيشلاق ائديرميشلر. آما سويوق قيشلارين بيرينده، جمال آوا کندينده اونلارين مال-داوارلاريني بوران و شاختا وورور. بو ايشين نتيجه سينده 5000 باش قويونلاريني الدن وئريرلر. بونا گؤره­ده ائللري جمال آوا کنديني مسکن ائديب، اورادا قالارگي اولورلار.

قوربان 20 ياشينا چاتديقدان سونرا، آشيقليق هوسينه دوشور و موسيقي داليجا گئدير. (موسيقي­يه علاقه­سينه گؤره ده، اونون سوي آديني موسيقي سئچيرلر). او زمانلار خويدا بير آيدين اوره­کلي و اوستاد آشيق ياشاييرميش، آدينا کورفرهاد دئييرميشلر. قوربان دا آشيق فرهادي اؤزونه اوستاد سئچيب، اونون محضرينه گئديب ساز چالماق ايله اوخوماغي اؤيره­نمگه باشلايير. اؤنجه آشيق فرهاد اونون اللريني لمس ائده­رک، بارماقلارينين يوغون اولدوغونو دئيه­رک، اونون ساز چالانماياجاغيني بيلديرير. آما قوربان تصميمين توتموشدور و هئچ نه اونو اؤز يولوندان دؤند­ره بيلمزدي.
 آشيقليق عشقي قورباني گئري دؤنمگه قويمايير و بو يولدان ال چکمه­يير. بير نئچه مدت آشيق فرهادين يانينا گئدن، قوربان، اونون سئچيلن و ساييلان شاگردلريندن اولور و آشيقليق استعداديني هر کسه نشان وئرير. گؤزل و اينجه دويغولاريني سازلا قوووشدوروب، آشيقليغا باشلايير.

 قوربان ائله سازي اؤيره­نديگي يئر، يعني خويدا آشيقليق ائديب اورادا قالارگي اولور. خويدان ائولنن آشيق قوربان، ايکي قيز، بير اوغلان آتاسي اولور و خويدا بير-بيرينين آرديندان آشيقليقلا برابر خوش گونلري کئچيرير.
آما بو خوش گونلر دوام تاپمايير و آذربايجانين بلالي ايللري گليب چاتير. آذربايجانين غرب بؤلگه­سي چئشيتلي هجوملار و باسقينلارا معروض قالير. ارمني-جيلو دسته­لري خوي، سالماس، اورمو، سولدوزا باسقين ائديرلر و چوخلو آذربايجان اهالسيني اؤلدوروب  يوردلاريني ويران قويورلار.

ارمني لرين باسقيني ايله برابر، خوي شهري 1296-جي ايلده ارمني دسته­لرينين 57 گونلوک محاصره­سينده قالير. بونونلا برابر، آجليق و قحطليک باش وئرير. يئمگه و قارين دويوزدورماق اوچون هئچ نه تاپيلمايير. بونا گؤره ده، خوي اهاليسينين چوخو خسته­لنرک، سوء تغذيه و سوء هاضمه خسته­ليکلرينه توش گليرلر. بو ايش، آشيق قوربانين اوشاقلاريندان دا يان کئچمه­يير، اونلاري دا ياخالاييب، اؤلوملرينه سبب اولور. قوربانين حيات يولداشي دا اوشاقلارينين دقّيني گتيريب، وفات ائيله يير.

قوربان، بير داها خويدا، تک و يالقيز قالير. بو اوزدن خويدان چيخيب، ديلمانا يوللانير. ديلماندا آشيقليق ائديب، گونونو کئچيرير. بير نئچه مدت ديلماندا ياشاديقدان سونرا، بير دول آرواد ايله عائله حياتي قوروب و اورادا قالارگي اولور. قوربانين ديلماندا قالديغي ايللرده، اوچ اوغلو دونيايا گلير.

علي(1302)، ولي(1304)، قولو(1306). فلكين اليندن، آجيلار چکن قوربان، يئنه ده فلگين بلاسي ايله راستلاشير. 1310-جو ايلده ديلمانا بؤيوک بير زلزله گليب، هر نه­يي يئر ايله بير ائديب  ديلماندان يالنيز بير تورپاقلي تپه قالير. خوشبختچيليکدن بو دفعه قوربانين عائله­سي، جان ساغليغي ايله، بو بلادان قورتولورلار. او زمان ديلمانين يئرينه، سالماس آددا يئني بير شهر سالينير.

 قوربان دا اورا گئديب، بير ائو تيکير و سالماسدا قالير. سالماسدا، 1312-جي ايلده آشيغين خديجه آدلي بير قيزي دونيايا گلير. بير نئچه مدت سونرا، سالماسدا ياشايا بيلمه­ين و اؤز کندلريني اؤزله­ين، آشيق قوربان، کندلرينه قاييدير. قوربانين جمال آوايا گيريشي ايله، آتاسي وفات ائيله يير. آتاسينين جسديني قوشچويا داشيان واختدا، يولدا آتاسي حاقدا مرثيه لر و آغي لار اوخوياراق، قوشچودا تورپاغا تاپشيرير.

يئنه ده، روزگار قورباندان دؤنور، 1317-جي ايلده بير داها حيات يولداشي فاطما خانيمي ايتيرير، قوربان يئنه ده يالقيز قالير. بير داها ائولنمه­ين، قوربان، آشيقليغا گئتديگي گونلر، اوشاقلاريني باجيسينا تاپشيريب، چاغيريلديغي  يئرلره يوللانير.

اؤز دؤورونده انزل ماحالينين ان آدليم آشيغي اولان، قوربان موسيقي، سازي و سؤزو ايله توي شنليک مراسملرينه قاتيلير. ها بئله، انزل ماحاليندا، ديل جلماني آدي ايله مشهور اولان، جلمان(ياللي) ريتم لريني اوستاليقلا ايفا ائدير.
چوخ شيرين صحبت و داستانلاري ايله مشهور اولان قوربان موسيقي، جمال آوا کندينين قهوه خاناسيندا  چوخلارينا بو شفاهي خالق داستانلاريندان اؤيره­دير. آما بير داهادا چرخ، دؤنور و بو دفعه سيرا دموکرات کوردلرينده­دير. دموکرات کوردلري، انزل ماحالينا يورويوب، نئچه کندي و اونونلا برابر عائله­لريني تالان ائديرلر. بو تالاندان، قوربانين عائله­سي ده، نصيبسيز قالمايير و پاييني آلير.

 عؤمرونون سون گونلرينه قدر، آشيقليق ايله مشغول اولان، آشيق قوربان موسيقي نهايت 1334-جو ايلده، بير سويوق قيش گونونده، جمال آوا کندينين قهوه خاناسيندا گاز ايله زهرلنيب و مسموم اولور و ايکي گوندن سونرا بو دونياني ترک ائده­رک، ابديته قووشور.

 اونو جمال آوا کندينين مزارليغيندا دفن ائديرلر. اوشاقلارينين دئديگينه گؤره، عؤمرونون ياشاديغي ايللرده، دائم غرور و عزت ايله ياشاميشدي و فلكين مختلف سيناقلاريندان باش اوجا چيخمشدير.

آشيق قوربان هم ده، بير مؤمن و اعتقادلي مسلمان­ ايدي. او محرم و صفر آيلارينا خاص حؤرمت بسله­ميشدي. قوربان، محرم و صفر آيلاريندا، سازينين پرده­لريني و سيملريني آچاراق، بو آيلاردان سونرا، بير داها سازينا پرده و سيم قوشورموش. بو دا اونون بو آيلاردا هوس ائديب  ساز چالما فکرينه دوشمه­سينين قارشيسيني آلماسي سببيندن ايدي.اونون سازی هله ده قالیر و اؤز نوه سینین ائوینده دیر.
دئييلنلره گؤره، اؤزونه مخصوص ابهتي وار ايميش و آشيقليقدا، آشيقليق شخصيتينه چاتميش ايدي.اورمونون آدليم آشيغي، آشيق فرهاد ايله ده، دوستلوق علاقه­لري وار ايميش و اونون شاگردلرينه ده چوخ سؤزلر اؤيره­تميشدير. آشيق درويش کيمي، بؤيوک آشيقلاردا اوندان بير واختلار سؤز-صحبت اؤيره­نميش ايميشلر.

او گئتدي، آما اونون آدي و يادي بوگون ديللرده قاليب و ياشايير و خوش سؤزلر ايله آنيلير. هله ده شهريميزين قوجامان انسانلاري اونون سؤز-صحبتي و مردانه­ليگيندن دئييرلر.بو دونيادا انسانين اؤلوموندن سونرا، ياخشي آد قاليرسا، نه ياخشي. بئله انسانلارين ياشاييشلاري دا بيزه اؤرنک اولماليدير. بو دونيادا انساندان بير قورو آد قالار، او دا پيس اولسا نه­يه دگر. سؤز صرافي خسته قاسم دئميشکن:

خسته قاسم, کيمه قيلسين داديني؟

جاني چيخسين, اؤزو چکسين اودونو

ياخشي ايگيد يامان ائتمز آديني

يامان آددان چونکو اؤلوم ياخشيدي

حکیم آللاهین سئورسن ائیله دوامی حکیم

ال منیم دی اتک سنین ایله چارامی حکیم

گئجه گوندوز درد الیندن داد فریاد ائیلرم

چرخی فلک ایچیردیب دی دردی ورامی حکیم

گئجه گوندوز درد الینن منده گلدیم آمانا

آخدی گوزوم یاشی دوندو بحری عوممانا

گورممیرم قوهوم قارداش ائللر اولوب بیگانا

چرخی فلک وطنیمدن سالیب آرامی حکیم

یئری ای بی وفا دونیا سنده یوخوموش وفا

اولموشام غم باری کئشی چکرم جوری جفا

ایسته رم یارادان تانری دان ائیله سین درده شفا

ارسطو افلاطون لوقمان یبلمز چارامی حکیم

قوربت ائلده خسته دوشدوم منده قالدیم بئچارا

دولدو اجل پیمانه سی ایندی اولدو آشکارا

میسکینم عرضی حالیمی یئتیرین او نازلی یارا

آغلاسین آناملان باجیم اورتسون قارامی حکیم

الاهين آدينان

تمام دوسلاري سلاملايرام

بوسؤور كي سايتن اولي دير و بيز اؤزوموز عاشيق اولاديق ايستيرم اؤز آتاوبابام نان يازام

منيم بابام رحمتليق عاشق قربان خان بابا اغلو بير بويوك بير اوستاد وعاشيق دير كي ايلر بويو مندان قاباق1260-نجي گونش ايلي نده اورمونون انزل ماحالينين جمال آباد بير ايلات اوينده دونيايا گلميشدير وجوانلقدا خوي ماحاليندا بير بويوك و كور عاشيق فرهاد آدلا عاشيق يانيندا اوستاليق دورسيني آليب واؤندان سونرا اؤز كندينا قايديب و بير مدت سونرا سلماسين ديلمان كندينا گديب اردا اولنيب وبير وارلي خانيم آلاندان سونرا ديلمان زلزله سين سونرا يكي اولادينان وايالينان گينه جمال آباد كندينه قايديب اردا حيات گجيرديب وعمرونون بوي هابويو نچه بير شاييدلار تربيت اليب از او جمله دن اوز اغلو عاشيق علي وعاشق ولي وعاشق قلي كي هامي سي معرفي الاجاق عاشق قربان نچه ايل عاشيق ليق اوستاليق وبؤيوك ليق ايلينن سونرا دونيا انادا وفا ايلمير وبير سحر وقتي 1334-نجي گونش ايلينده 74 ياشيندا دونياني ترك ايليب وشيرين جانين سسين وسازين وسؤزون حق تعالايا تاوشيرير واؤز اورگين ده كي سوزلرين اؤزينن توپراقا آپارير وجمال آباد كندينين قبيرستانليق ندا توپراقا تاپشيريلدي .

زامانا چوق بوفا دير چون اونون آدين دا آرادان آپاردي وقويمادي اندان حتي بير قورو آد قالا.

او رحمت ليق اؤزونون بو صنغتا چكيلمقيني بيلا سويلور:

"منيم بو ايشا گلميقيم هيچ بير زاد ديلدي جز اشقگ (عشق) وعلاقا وتارينين ومولانين (حضرت علي ع ) لطفي وسخاوتي" .

باشي ديبي :اوز شايدلا ري ومن